شو هي البكلوريا .....

أولاَ : اللغة الانكليزية ( أحلى مادة في المنهاج) :

اللهم استر ... ثلاثة كتب ... Students' book – Activity Book – Scientific Section
وفيها أربعة وحدات رئيسية : Adventure – Stories – Wheels – The Media
تحتوي على العديد من دروس القواعد والمفردات الجديدة والتمارين الرااااااااااائعة
أما الكتاب الملحق (العلمي) فهو يتضمن بعض المواضيع العلمية مثل : إعادة التصنيع والحياة في الفضاء وتكنولوجيا المعلومات وتاريخ جائزة نوبل بالإضافة إلى دراسة الكافئين وجراحة العين.

نصيحة مجرب : تحتاج اللغة الانكليزية إلى وقت وممارسة ولا تحتاج إلى بصم التمارين الموجودة في الكتاب.

ثانياً : الرياضيات :

وكمان فيها 3 كتب ... والله يجيرنا ... التحليل .. الهندسة التحليلة ... الجــبر..

بالنسبة للتحليل .. بيلف وبيدور وبيلف وبيدور بس بيضل بأرضو .. بيحكي عن التوابع .. بيبدا بالتابع العددي وبعدين بينتقل للتابع الأسي وبعدا بيروح للتابع اللوغارتمي وبينتهي بالمعادلات التفاضلية .
أما بالنسبة لأختو الهندسة التحليلة ... أهم شي فيها هي المثلثات .. وما أدراك ما المثلثات... قوانين وتطبيق احفظ القانون وطبقو وبرهن النظريات ... بعدين بتجي الدائرة .. بحث خفيف نضيف وعلى المعدة مو تقيل ... بعدها القطوووووع ... قطع مكافئ – ناقص – زائد (كتير أحيانا الطلاب بيخربطو بقوانينون بس التركيز بيحل هالمشكلة .. ممكن تعمل جدول فيو مقارنة للأشكال العامة لمعادلات القطوع)... وآخر شي بهالكتاب الحلو هي الفراغية ... بتعتمد بشكل كبير على التخيل الفراغي وقوانينها سهلة وحلوة .. يعني مهضومة .
وآخر أخ إلون هو الجبر .. رح يساعدك هالكتاب بموضوع الإحصاء .. وكمان بيهتم بالاحتمالات (حلووووات) بعدين بتجي المحددات والمصفوفات (بدها فهم .. ما كتير صعبة) وآخر شي فيو هو المعادلات الخطية والأعداد المركبة.

نصيحة مجرب : حل تمارين على قد ما فيك .. كلما بتحل تمارين أكتر كلما بتلاقي الرياضيات أسهل وأحلى.


ثالثاً : اللغة العربية :

كمان 3 كتب (شو قصتنا مع الرقم 3؟؟؟)
أول كتاب هو القواعد : بالنسبة لقسم العلمي .. القواعد كتير بسيطة وما فيها تعقيدات وكلها بتحكي عن أساليب النفي والاستفهام والتوكيد والتعجب .....الخ ... ونسبة كبيرة من معلوماتو مارّة علينا من قبل.
الكتاب التاني : القراءة .. كتاب غني عن التعريف .. بترك المجال لعقلكون انو يستكشفووووو..
الكتاب الثالث : الأدب ... (جلطة)
بشكل عام مؤلف من قسمين – دراسات أدبية : بيحكي عن المذاهب الأدبية وفن المسرح والمقالة والنثر .. باختصار هدووووول للبصم ...
القسم التاني : النــــــصـــوص : فيو 9 محاور أساسية .. وهو بيكمل الطريق اللي بدأو فيو اخواتو بالسنوات الماضية بيبدا من الاستبداد – المشاكل الاجتماعية – الاستعمار – الاحتلال الصهيوني – الأدب الملتزم – المرأة – منجزات الانسان العربي – الأدب الوجداني وآخر محور هو أدب المهجر.. وتمتعوا بأروع القصاااااااااااائد..

نصيحة مجرب : قسم الأدب بدو إعادة كتير لأنو بينتسى ومتل ما منعرف الأسى ما بينتسى...

رابعاً : الفيزياء (بيقولو عنها اصعب مادة)

فيها بعض المواضيع المهمة .. السرعة والتسارع (هدول أساسون بالحادي عشر) وبعدها تحريك الأجسام .. مهم كتير هالقسم وبعدين بيبلش هالكتاب بالقذف (الله يحمينا) وبعدا بينتقل للمكثفات قوانين سهلة ومسائل حلوة... وبيجي دور المغناطيسية (بدها تركيز بالمسائل) وبعدا النواسات (بدها شغل شوي) بعدين بيدخل مخ الطالب وبيسبح بـ " الأمواج " وآخر شي فيو هو الالكترونيات.

نصيحة مجرب : النصف الأول من الكتاب يحتاج إلى تركيز شديد في المسائل وحفظ القوانين بشكل جيد.

خامساً : الـــــــعلوووووووووم (الله يا دكتووووور):

علوم البكالوريا هو بأغلبو عن جسم الإنسان وقسم صغير عن النبات .. بيحكي هالكتاب الحلووو بالبداية عن الأعصاب والخلايا العصبية .. بعدين بينتقل للتكاثر عند النبات وبعدا عند الإنسان وطبعا في كم صفحة عن المناعة وآخر شي فيو هو الوراثة (الوراثة فيها مسائل .. ما ترتعب .. بسيطة .. الفهم أساس كلشي)

نصيحة مجرب : العلوم بدو تكرااااااااار .. ومتل ما منعرف التكرار بيعلم الكنار والشطار

سادساً : اللغة الفرنسية (C'est bien):

الكتاب سميييييييييك بس نصو محذووووووف .. المطلوب 9 دروس بس .. 3 دروس مشتركة بين العلمي والأدبي و6 خاصة بكل قسم .. وكالعادة نص وعليه أسئلة – مفردات وكلمات – قواعد - ترجمة – موضوع ..وبسسسسس.
ولا تنسى الكتاب التاني ( رقيق كتيير ) فيو قصص (غير شكل .. الله لا يبلي مخلوق) بيجي منها فراغات وصح وخطأ.
نصيحة مجرب : التمارين تأتي كما هي حرفياً في الامتحان ولا داعي للفهم الزائد ..

سابعاً : الكيمياء :

بيتألف من 3 اقسام رئيسية ( عم تعدو كم مرة قلنا 3؟؟؟)
أول شي .. الأبحاث الأربعة الأولى .. نظرية بحتة .. من نوع اغسل والبس .. عفوا ابصم وامشي..
والللي بعدو بيحكي عن التفاعلات وسرعة التفاعل والتوازن ومن هالحكي .. فيو مسائل كتيير.
وآخر شي هي حبيبة قلوبنا " الكيمياء العضوية " بدها فهم وحفظ المعادلات ومسائلها سهلة وحلوة.

نصيحة مجرب : ما تخلي معلومة فيها تمرق من دون ما تفهمها .. لأنو بتصير صعبة عليك بعدين .

ثامناً : التربية القومية :

18 درس بسس .. ما كتار مووو؟؟؟ .. انت وشطارتك .. أهم شي ما تراكم شي ..

نصيحة مجرب : احفظ كل درس بدرسو مع الأستا مشان ما توصل للامتحان وانت ما خلصت غير أول 8 دروس.

تاسعاً : التربية الإسلامية :

مو داخلة بالمجموع النهائي بس كمان لازم تدرس كم كلمة منها .. وكالعادة آيات وأحاديث وقسم أبحاااااااااااااااث ...

نصيحة مجرب : فيك تجيب المقاطع على شكل صوت وتسمعها عالـ mp3 بالطريق .. لوقت اللي تخلص السنة بتكون حفظتووووون ..


وآخر شي ... بتمنى التوفيق لكل طلاب البكالوريا اللي رح يصير مخوووووووووون . .... (خليها نقط)